(Ձայներ` 7)

Երեկ՝ հուլիսի 17-ին, ժամը 22:30-ի սահմաններում, շտապօգնության մեքենայով տնից Վանաձորի բժշկական կենտրոն է տեղափոխվել մի քաղաքացի, ով դրանից մոտ կես ժամ առաջ, Երևանյան խճուղու վրա, ծեծի է ենթարկվել մի խումբ մարդկանց կողմից: Lorinews.am-ին ահազանգած քաղաքացին հայտնել է, որ ինքը ականատես է եղել, թե ինչպես են դատական ակտերի հարկադիր կատարոները(ԴԱՀԿ) աշխատակիցները ծեծի ենթարկում քաղաքացիներին՝ կոպտորեն խախտելով հասարակական կարգը: Մեզ ահազանգած քաղաքացու փոխանցմամբ, միջադեպի պատճառը եղել է հետևյալը. «Քաղաքացու «Օպել» մեքենան պաժառնու խաչմերուկին թեթև խփեց ԴԱՀԿ-ի աշխատակցի «Աուդի» մակնիշի մեքենային, դրանք էլ իջան, չգիտեմ ինչ եղավ, սկսեցին ծեծել էդ տղային կնոջ ու երեխու առաջ, փողոցի մեջտեղում, հետո ԴԱՀԿ աշխատակիցների թիվը ավելացավ… էն կարգի ծեծեցին, որ քաղաքացին նստեց ավտոն ասավ գնում եմ հիվանդանոց, էն վիճակն էր, որ թաղամասից որևէ մեկը չփորձեց անգամ խառնվել կռվին… ԴԱՀԿ-ի աշխատակիցները ֆոռմով էին, ճանապարհն էլ խցանվել էր, ոչ մի ոստիկան չկար»,-հայտնեց մեր աղբյուրը:
Կեսգիշերին Վանաձորի բժշկական կենտրոնից մեզ հետ զրույցում հաստատեցին, որ իսկապես շտապօգնության մեքենայով իրենց մոտ է տեղափոխվել 1977 թ-ին ծնված Ռ.Վ.-ն՝ գլխի և մարմնի շրջանում ստացած քերծվածքներով ու կապտուկներով: Արդեն այսօր մեզ հայտնի դարձավ, որ ծեծի ենթարկված քաղաքացին դեպքի մասոին հաղորդում է ներկայացրել ոստկանության Վանաձորի Բազումի բաժին, որտեղ էլ նյութեր են նախապատրաստվում:
Ոստիկանության լրատվական վարչությունից Lorinews.am-ի հետ զրույցում հաստատեցին, որ գլխի շրջանում ստացած վնասվածքներով հիվանդանոց քաղաքացի է տեղափոխվել: Այն հարցին, թե քաղաքացին իր հայտարարության մեջ նշե՞լ է, որ իրեն ծեծի են ենթարկել ԴԱՀԿ աշխատակիցները, թե՞ ոչ, ոստիկանության լրատվական վարչության աշխատակից Զարզանդ Գաբրիելյանն ասաց. «Նման ահազանգ ստացել ենք, հաղորդում էլ կա ոստիկանությունում, այլ մանրամասներ չենք կարող հայտնել»: Մեկ անգամ ևս ճշտեցինք՝ քաղաքացին տվե՞լ է ԴԱՀԿ աշխատակիցների անունները, թե՞ ոչ, ստացանք հետևալ պատասխանը. «Միգուցե տվել է… այլ բան չեմ կարող հայտնել»:
Մինչ ոստիկանության լրատվական վարչությունը ոչ հերքում է և ոչ էլ հաստատում, մենք մեր աբյուրներով պարզեցինք, որ ծեծի ենթարկված քաղաքացին իր դիմումում հստակ նշել է, որ իրեն ծեծի են ենթարկել ԴԱՀԿ աշխատակիցները:
Lorinews.am

ՏԱՐԱԾԵԼ ՍՈՑԻԱԼԱԿԱՆ ՑԱՆՑԵՐՈՒՄ