(Ձայներ` 141)

<<Վանաձորում երեխաներ են առևանգում, որից հետո հանում են երիկամները, իսկ մահացած փոքրիկներին թողնում փողոցում ու հեռանում>>: Lorinews.am Լոռու մարզային լրատվական կայքը վերջին օրերին նմանատիպ ահազանգեր շատ է ստացել: Ահազանգող քաղաքացիները միաբերան պնդում են՝ երեխաներ են կորել, չնայած մեր կողմից տրվող հերքումներին, այնուամենայնիվ, Վանաձորում խուճապը շարունակվում է: Երեկ էլ նմանատիպ ահազանգեր ստացվեցին նաև մարզի Թումանյանի տարածաշրջանի գյուղական համայնքների բնակիչներից, ովքեր նշում էին, թե իրենց գյուղի երեխաներին գողանում են գնչուները, ովքեր գյուղ են ժամանել գուշակություն անելու նպատակով: Ստեղծված խուճապն ավելի է սրվել, երբ ոստիկանությունը պլանային ծառայություն է սկսել իրականացնել Վանաձոր-Ալավերդի ավտոճանապարհի սկզբնամասում: Խուճապահար բնակիչներին թվացել է, թե ոստիկանության զինված ծառայությունը կապված է երեխաների գողությունների հետ: Այս ամենի հետ կապված Lorinews.am-ը զրուցեց ոստիկանության լրատվության և հասարակայնության հետ կապերի վարչության պետ Աշոտ Ահարոնյանի հետ, ով ևս մեկ անգամ հերքեց նման լուրերը, նշելով, որ նմանատիպ խոսակցությունները սկսել են դեռևս Արմավիրի մարզից, երկու օր առաջ տարածվել Շիրակի, այսօր էլ արդեն Լոռու մարզում.<<Նման բան բացառվում է, չի կարող նման բան լինել>>,-ասաց պարոն Ահարոնյանը, ազաբնակչությանը մեկ անգամ ևս հորդորելով չհավատալ նմանատիպ խոսակցություններին:
Հետաքրքրականն այն է, որ ահազանգող քաղաքացիները չնայած ամենայն <<մանրամասնությամբ>> պատմում են, թե ինչպես են առևանգել երեխաներին, ինչպես են հեռացրել երիկամներն ու որտեղ են թողել մահացած մարդկանց մարմինները, չեն կարողանում որևէ կերպ նշել, թե կոնկրետ ում հետ է նման դեպք պատահել կամ կոնկրետ ով է տեսել:
Նմանատիպ խուճապ ստեղծող մարդկանց որևէ որակում տալն անգամ սխալ է, քանի որ որակական հատկանիշ ունեցող մարդը իրեն թույլ էր տա անտեղի սարսափ տարածել բնակչության շրջանում: Մնում է հուսալ, որ ժամանակի ընթացքում կպարզվի, թե ով է այս զառանցանքի հեղինակը ու պատասխանատվության կենթարկվի օրենքի ամբողջ խստությամբ:
Ալեն Գրիգորյան
Lorinews.am

ՏԱՐԱԾԵԼ ՍՈՑԻԱԼԱԿԱՆ ՑԱՆՑԵՐՈՒՄ