Վեբ Կայքերի Պատրաստում և տեղադրում հոսթինգում: Վեբ Կայքերի սպասարկում:

Այս պահին Վանաձորի քաղաքապետարանի նիստերի դահլիճում տեղի է ունենում Վանաձոր համայնքի ավագանու արտահերթ նիստ, որը, սակայն դռնփակ է անցկացվում: Նիստի մասին լրատվամիջոցներին չեն տեղեկացրել, նիստն սկսվելուց առաջ լրագրողներին դուրս են հրավիրել՝ պատճառաբանելով, թե նիստը դռնփակ է: Լրագրողների ներկայությանը կողմ են եղել միայն ավագանու անդամներ Արամ Խաչատրյանը և Խորեն Վարդանյանը:
Դեռ երեկվանից, երբ լրագրողները «գաղտանզերծել» էին կայանալիք նիստը, քաղաքապետարանի պաշտոնական կայքում արդեն կեսգիշերին մոտ հայտնվեց հայտարարություն ավագանու տեղի, ժամի ու օրակարգային մեկ հարցի մասին:
Lorinews.am-ը դեռ երեկ փորձեց ավագանու մի քանի անդամներից պարզել, թե ինչո՞վ է պայմանավորված արտահեթ նիստ հրավիրելն ու որո՞նք են օրակարգային հարցերը, սակայն ավագանու մի քանի անդամներ պարզապես հրաժարվել են որևէ տեղեկատվություն տալ ավագանու արտահերթ նիստի վերաբերյալ: Տպավորություն է, թե տեղի է ունենալու ոչ թե շարքային ավագանու նիստ, այլ ԱԱԾ գաղտնի խորհրդակցություն: Վանաձորի քաղաքապետարանի կայքէջում ավագանու օրակարգային հարցի վերաբերյալ նշված է հետևյալը. «ՀՀ Լոռու մարզի ընդհանուր իրավասության դատարանի 2011 թվականի հոկտեմբերի 10-ի թիվ ԼԴ/0565/02/09 վճիռը վերաքննության կարգով բողոքարկելու մասին»: Մեր տեղեկություններով, հարցը վերաբերվում է Վանաձորում կառուցվող էլիտար շենքում բնակիչներից մեկին բնակարան չհատկացնելու մասին քաղաքապետի որոշմանը, որը սակայն բնակիչը դատարանում բողոքարկել է ու շահել դատը:
Lorinews.am-ը առաջիկայում կփորձի պարզել, թե ինչ գաղտնի ու կարևորագույն հարց են քննարկել Վանաձորի քաղաքապետն ու ավագանին, որ երկու օր շարունակ լրագրողներից այս ամենը գաղտնի է պահվում:
Էդվարդ Արզումանյան
Lorinews.am